Ақмола облысында найзағай түсіп, 10 жасар бала көз жұмды

Ақмола облысында қайғылы жағдай болды. Ойнап жүрген екі балаға найзағай түсті, деп хабарлайды Azattyq Rýhy агенттігі Sinegor.kz сайтына сілтеме жасап.

Алдын ала ақпаратқа қарағанда, шамамен сағат 14:00-де Үлгі ауылында найзағай балаларға түскен.

Олардың бірі – 2015 жылы туған бала, сол жерде көз жұмды. Екіншісі – 2010 жылы туған бала, ауыр жарақат алған.

«Ол Біржан сал аудандық ауруханасына жеткізілді. Қазір дәрігерлер баланың өмірін сақтап қалу үшін бар күшін салып жатыр», – делінген хабарламада.

Екі бала да Астана қаласының тұрғыны екені анықталды. Қайғылы оқиғаның барлық мән-жайы анықталып жатыр.