Астана әуежайындағы жөндеу жұмысына байланысты Air Astana компаниясының рейстері өзгерді

Air Astana әуе компаниясы Астанадағы әуежайдың ұшу-қону жолағында жоспарлы жөндеу жүргізілуіне байланысты рейстер кестесіне өзгерістен енгізілгенін хабарлады, деп жазады Azattyq Rýhy.

Жөндеу жұмысы 1-4 қыркүйек аралығында және 8 қыркүйектен 31 қазанға дейін күн сайын сағат 10:00-ден 18:00-ге дейін жүргізіледі. Бұл уақытта ұшу-қону жолағы жабық болады. Ал 5-7 қыркүйек күндері ол әдеттегі режимде жұмыс істейді.

Өзгерістер Алматы, Атырау, Ақтау, Ақтөбе, Орал, Қостанай және Өскемен қалаларына ішкі рейстерге, сондай-ақ халықаралық бағыттарға – Франкфурт, Дубай, Сеул, Ыстамбұл, Анталия, Бейжің, Пхукет және Нячанг қалаларына қатынайтын рейстерге әсер етеді.

«Түзетулерге байланысты рейстері өзгерген жолаушыларға брондау кезінде көрсетілген байланыс деректері арқылы алдын ала хабар берілді. Үздіксіз рейстерін жоғалтқан жолаушылар үшін балама бағыттар қарастырылған», – деп хабарлады Air Astana.