Қызылорда облысында есірткі алқабы табылды (ВИДЕО)

Қызылорда облысында ірі есірткі алқабы анықталып, жойылды. Бұл туралы Azattyq Rýhy агенттігі Polisia.kz-ке сілтеме жасап хабарлайды.

Арнайы операция ҚР ІІМ және облыстық полиция департаментінің есірткі қылмысына қарсы іс-қимыл басқармасы жүргізіп жатқан «Қарасора-2025» жедел-профилактикалық іс-шарасы аясында өтті.

Есірткі алқабы Сырдария ауданынан табылды

Рейд кезінде полиция қызметкерлері мен Ұлттық ұланның «Бүркіт» арнайы жасағы Сырдария ауданы Бесарық ауылының маңынан ірі есірткі алқабын тапты.

Жалпы 1156 түп есірткі өсімдігі тәркіленді. Салмағы шамамен 58 келіге жуық. Оқиға орнынан қосымша 1 келі 610 грамм кептірілген марихуана алынды.

Күдіктілер ұсталды

Оқиға орнында облыс тұрғындары – 42 және 33 жастағы екі азамат ұсталып, қамауға алынды. Қазір бұл факті бойынша сотқа дейінгі тергеу амалдары жүріп жатыр.

«Қарасора – 2025» нәтижесі

Жедел іс-шара басталғалы бері:

• 172 есірткі қылмысы әшкереленді;
• Жалпы 959 келі есірткі тәркіленді;
• 5 фитозертхана анықталды;
• Есірткі өсірген 36 адам ұсталды.