Ақмола облысында балалар лагері заңсыз жұмыс істегені анықталды
Бұл мекеме тиісті рұқсат құжаттарынсыз жұмыс істеген
Ақмола облысында полиция балалар лагерінің заңсыз ұйымдастырылуына қатысты тергеу жүргізіп жатыр, деп хабарлайды Azattyq Rýhy.
Белгілі болғандай, бұл мекеме тиісті рұқсат құжаттарынсыз жұмыс істеген.
Бейресми балалар лагерінің жұмыс істеп жатқаны туралы ақпарат 31 шілде күні Целиноград ауданының полиция бөліміне түскен. Алдын ала мәліметтер бойынша, лагерь өңірдегі ауылдардың бірінде құжаттарсыз ұйымдастырылған.
«Аталған факті бойынша ҚР Қылмыстық кодексінің «Жалған құжаттарды, мөрлерді, штамптарды, бланкілерді, мемлекеттік пошта төлемі белгілерін, мемлекеттік наградаларды қолдан жасау, дайындау немесе өткізу» бабымен сотқа дейінгі тергеу басталды», – деп хабарлады Ақмола облыстық полиция департаменті.
Полиция қызметкерлері болжамды ұйымдастырушының жеке басын анықтады, ол 40 жастағы Астана қаласының тұрғыны болып шықты. Қазіргі уақытта тергеу оның заңсыз әрекеттерге қатысы бар-жоғын анықтап жатыр.
Полиция ата-аналарға балаларды лагерьге жібермес бұрын мекеменің құжаттарын тексерудің маңыздылығын ескертті.
