АҚШ азаматы Петропавлдағы университетке оқуға түсті
43 жастағы АҚШ азаматы Қозыбаев университетіне оқуға түспек
АҚШ-тың 43 жастағы азаматы Петропавлдағы М.Қозыбаев атындағы университетке оқуға түсіп, студент атанды, деп хабарлайды Azattyq Rýhy.
Аталмыш оқу орнының мәліметінше, ЖОО-да әлемнің 16 елінен келген студенттер білім алып жүр. Әсіресе Аризона университетімен бірлескен қос дипломды бағдарлама шетелдіктерге үлкен қызығушылық тудырған көрінеді.
Нью-Йорктен Петропавлға дейінгі жол
Биыл оқу ордасына АҚШ-тың 43 жастағы азаматы Илья Кушнирский құжат тапсырды. Ол адам жасының оқуға түсуіне кедергі емес екенін айтып, білім алуды қайта бастауды жөн көрген.
«Мен Нью-Йорк қаласынанмын. Соңғы екі жылда Санкт-Петербургте клиникалық психология бойынша қайта даярлаудан өттім. Алматыда өткен бір семинарда Қозыбаев университеті туралы естіп, қызығушылық таныттым. Екі диплом алу мүмкіндігі мені қатты қызықтырды», – дейді Илья.
Аризонадағы оқу құнынан бірнеше есе арзан
Илья «Білім берудегі психология» мамандығы бойынша қос диплом бағдарламасымен ақылы негізде оқитын болады. Дегенмен ол бұл шешімді қаржылық жағынан тиімді деп есептейді.
Мәселен, егер ол оқуын АҚШ-тағы Аризона университетінің Тусон кампусында бастаса, жылына 40 000 АҚШ долларынан астам қаржы жұмсауы қажет болар еді. Ал Қозыбаев университетінде бұл шығын әлдеқайда төмен.
