Қазақстанда темекі шегушілер қатары азайды

2025 жылғы қаңтарда Ұлттық статистика бюросы елімізде ересек тұрғындар арасындағы темекі тұтыну деңгейін анықтауға бағытталған жыл сайынғы зерттеуін жүргізді, деп хабарлайды Azattyq Rýhy.

Сауалнама Қазақстанның барлық өңірінде, сондай-ақ Астана, Алматы және Шымкент қалаларында өтті. Оған 15 жастан асқан 12 000 үй шаруашылығының бір мүшесі қатысты.

Зерттеу нәтижесі бойынша, тексерілген азаматтардың 17,5%-ы қазіргі уақытта темекі шегетінін көрсетті. Бұл көрсеткіш 2024 жылы 20,7% болғанын ескерсек, темекі шегушілердің саны азайып отырғаны байқалады.

• Ауылдық жерлерде темекі тұтынатындар үлесі — 19,1%
• Қалалық жерлерде — 16,7%

Темекі тұтынатындар арасында ер адамдар — 34%, ал әйелдердің үлесі — 5% ғана. Бұл көрсеткіш темекі шегудің жыныстық құрылымын анық көрсетеді. Сонымен қатар, темекі шегушілердің 93,8%-ы тек өнеркәсіптік жолмен өндірілген темекі өнімдерін пайдаланады.

Мамандардың пікірінше, соңғы жылдары темекі шегуге қарсы қабылданған заңнамалық шаралар мен денсаулық сақтау насихатының күшеюі темекі тұтынушылар санының азаюына оң әсер етуде.