«Ер адам көрмеген әйелдер жас қыздармен қатынасқа түседі»: түрмедегі былық әшкере болды (ВИДЕО)

Алматы облысының Жауғашты ауылдық жеріндегі түрмеде 2,5 жыл жазасын өтеген Риза Мұсаханова Qazaq AIRAN YouTube арнасына берген сұхбат беріп, темір тордың арғы бетіндегі былықтар жайлы ашып айтты, деп хабарлайды Azattyq Rýhy.

Ол өз сөзінде түрменің іші өзіндік жеке бір әлем екенін, ол жақта жазасын өтеп жүрген қыз-келіншектер ер мен әйелдің рөліне түсіп, отбасылық өмір кешіп жүргенін айтты.

«Түрмеде көп отырғаннан ба, әйел адамдар өздерінің тұлғалық қасиетін жоғалтады. Біреуі еркек сияқты, біреуі оның әйелі сияқты болып кетеді. Ондай да мәселе бар ол жақта. Бұрыннан отырған әйелдер ұзақ уақыт еркек көрмегеннен өздері еркек сияқты болып кетеді. Олар омырауын байлап, шашын еркектер сияқты қырқып алып тастайды. Соған сай жүрісі де өзгереді. Еркектік гармоны көбейіп кетеді.

Содан жаңадан түскен жас қыздарды өздеріне тартып алып, әйел мен күйеудің рөлін ойнап, қатынасқа түседі. Оған көнбесе, соққыға жығылады. Көп уақыт отырғандардан жас қыздар қорқады, айтқанына көнеді. Солай бірге өмір сүріп кетеді. Сол әйелдер күйеуі және әйелі болып, қызғаныштан төбелесіп те жатады. Ондай жағдайлар көп», - дейді ол.

Ол сөзін жалғай отырып, мұндай жағдайлар түрме қызметкерлері тарапынан бақылауға алынбайтынын ерекше айтып өтті.

«Оларды ешкім қадағаламайды. Полиция қызметкерлеріне кофесі мен шоколады, темекісі болса, киімдерін жаңадан тіккізіп алса болды. Егер түрме қызметкерлері оларды (ред. – ер мен әйел рөлінде жүргендер) бір бөлмеде жатпайсың десе, шу шығады, тамырларын кесіп тастайды, асылып қалады, дәрі ішеді. Содан кейін бірге жатады.

Оларды «семейка» дейді. Олардың арнайы бөлімдері бар. Мынау Жауғаштыда (Алматы облысының Іле ауданы) олар өте көп.

Оның үстіне олар түрме қызметкерлерімен туысқан сияқты болып кетеді. Осылайша олар арқылы айтқандарын жасатып, жас қыздарды қысып жібереді. Жауғаштыда мен білетін қызметкерлердің көбісі 15-20 жыл жұмыс істеген. Сонда түрмеде жазасын өтеп жатқандармен бірдей уақыт сияқты ғой. Осылайша туысқан сияқты болып кетеді», - дейді Риза Мұсаханова.