Новости спорта, футбол, КПЛ

Елордада рұқсат етілмеген жерге қоқыс тастағандарға 36 млн теңге айыппұл салынды

Абаттандыру ережелерін бұзған 2 мыңнан астам құқық бұзушы анықталды

Елордада рұқсат етілмеген жерге қоқыс тастағандарға 36 млн теңге айыппұл салынды
Фото: astana.gov.kz

Елордада экологиялық полиция бөлімінің қызметкерлері қала сыртына рұқсатсыз қоқыс төгу фактілерін анықтау мақсатында рейд жүргізді. Қала сыртына құрылыс қалдықтарын шығаратын кәсіпорындар мен қала тұрғындары әкімшілік жауапкершілікке тартылады, деп хабарлайды Azattyq Rýhy тілшісі қала әкімдігінің ресми сайтына сілтеме жасап.

Қала әкімдігінің хабарлауынша, 2020 жылдың басынан абаттандыру ережелерін бұзған 2 мыңнан астам құқық бұзушыға 36 млн теңге айыппұл салынды. 

«Қазіргі уақытта біз рұқсат етілмеген полигондармен күресіп жатырмыз. «Нұрлы жол» вокзалының артында үлкен іргетас шұңқыры бар. Біз кейбір құрылыс компаниялары мен пәтерлерінде жөндеу жүргізетін адамдар түнде мұнда заңсыз қоқыс шығаратынын көріп отырмыз. Шара қолданамыз. Мұны қадағалайтын экологиялық полиция бар. Олар бұл жұмысты жақсы атқаруда. Құрылыс маусымы басталды, заңсыз қоқыс шығару фактілері көбейді. Заңға сәйкес олар құрылыс қалдықтарын мамандандырылған экологиялық полигонға апаруы керек. Ол Павлодар тас жолы бойы мен Алаш тас жолында орналасқан. Олар құрылыс қалдықтарын өңдейтін жерге апаруы тиіс. Тазалық мәдениетін қалыптастыру керек», – деді елорда әкімінің орынбасары Алтынбек Қайсағалиев. 

Бұған дейін елорда әкімі Алтай Көлгінов экологиялық полиция мен аудан әкімдеріне ескерту жасап, құрылыс қалдықтарының заңсыз шығарылуын болдырмауға және құрылыс қалдықтарын шығару орнын анықтауға тапсырма берген еді.

×
Бұл желілік ресурстың ақпараттық өнімдері 18 жастан асқан адамдарға арналған.