Астана күніне орай 100-ден астам мерекелік іс-шара өтеді

Астанада қала күніне орай 100-ден астам іс-шара өтеді, деп хабарлайды Azattyq Rýhy елорда әкімдігінің ресми сайтына сілтеме жасап. 

3 шілде

• "JazzVIBE" концерті (Есіл өзенінің жағасындағы Амфитеатр);
• Мүмкіндігі шектеулі спортшылар арасында алғашқы қалалық спартакиада (Паралимпиада орталығы);
• "Сарайшық" ауданы ұйымдары арасында волейболдан турнир (Б. Саттарханов атындағы спорт кешені);
• қазақ күресінен Қазақстан чемпионаты (Beeline Arena, 3-5 шілде күндері).

4 шілде

• "Аялаған Астана" атты мерекелік концерт (Әл-Фараби атындағы Оқушылар сарайы);
• Street-art форматындағы "Астанаға арнау" көше фестивалі (М.Өтемісов атындағы Оқушылар сарайы);
• Жұмысшы мамандықтар жылы аясында өткен "Менің мамандығым – мақтанышым" атты қалалық шығармашылық байқаудың жеңімпаздарын марапаттау рәсімі ("Жастар" сарайы);
• Еліміздің үздік әншілері, күйші-жыршылардың қатысуымен "Асыл мұра" атты мерекелік концерт (Бейбітшілік және келісім сарайы);
• асық атудан "Астана сақасы" турнирі ("Ғашықтар" саябағы);
• "Асқақтаған Астана!" мерекелік іс-шарасы - Домбыра party ("Нұржол" бульвары);
• "QALA FEST" фестивалі мен кітап жәрмеңкесі ("Жетісу" саябағы);
• зейнеткерлер арасында шахмат турнирі ("Ғашықтар" аллеясы);
• Байқоңыр ауданының коммуналдық қызметкерлері арасында мини-футбол турнирі;
• "Коммуналдық қызметкерлер" скверінің ашылу салтанаты (Абай даңғылы бойында).

5 шілде

• грек-рим, еркін күрес, дзюдо, қазақ күресі және автошеру қамтылған күрес фестивалі (Триатлон паркі);
• "Астана – арман қала" атты мерекелік концерт (Есіл өзенінің жағасындағы Амфитеатр);
• VI "Әскери керней" әскери-музыкалық фестивалі ("Ғашықтар", "Жетісу" мен "Жерұйық" саябақтары, ал 6 шілде күні "Қазақ елі" монументі маңайында гала-концертпен аяқталады);
• "Мерекелік саябақ" отбасылық демалыс фестивалі (Орталық саябақ, 5-6 шілде күндері);
• Қалалық перформанстар фестивалі (5-6 шілде күндері);
• Жұмысшы мамандықтар жылы аясында алғаш рет "Армандар орындалады" спектаклі қойылады (Мемлекеттік драма және комедия театры, 5-6 шілде күндері);
• Сондай-ақ, "Жастар", "Наз" бен "Қанаттылар" театрларында және музыкалық жас көрермен және Максим Горький атындағы академиялық орыс театрында жоспарланған спектакльдер қойылады.

6 шілде

• Ұлттық домбыра күніне орай мерекелік іс-шаралар ("Атырау" көпірі мен Орталық саябақ, мерекелік бағдарлама Амфитеатр сахнасында жалғасады);
• "Jastar Energy" жастар концерті ("Қазақ елі" монументі алаңында);
• отандық эстрада жұлдыздарының қатысуымен OPEN AIR концерті ("Астана-Арена" стадионы аумағында);
• заманауи би түрлерінен жастар арасында "Елордалық батл" би сайысы ("Ақжайық" сквері);
• бәйге түрлерінен "Елорда кубогы" турнирі және қазақтың ұлттық спорт түрлерінің үздіктері мен мықтылары қатысатын "Толағай" сайысы ("Қазанат" ипподромы);
• Дүниежүзілік бокс қауымдастығы World Boxing аясында ерлер мен әйелдер арасында бокстан Әлем кубогының финалы (Ж.Үшкемпіров атындағы Жекпе-жек сарайы, басталуы сағат 14:00-де, кіру тегін);
• Сонымен қатар қаланың тұрғын алаптарында күндізгі мерекелік концерттер ұйымдастырылады. Мереке күндері қала бойынша жаңа абаттандырылған қоғамдық кеңістіктер мен аулалар ашылады.

7 шілде

• Амфитеатр сахнасында "Алтын домбыра" мектебінің 400 оқушысының қатысуымен Ұлттық домбыра күніне арналған тағы бір мерекелік-концерттік бағдарлама өтеді.

8 шілде

• Тура сол жерде "Мерейлі отбасы" ұлттық байқауының жеңімпаздарын марапаттау салтанаты ұйымдастырылады.