Газа тұрғындары Қазақстанға көшіріле ме? СІМ жауап берді

Қазақстанның Сыртқы істер министрлігі Газа секторындағы тұрғындарды Қазақстанға көшіру туралы ақпаратты жоққа шығарды. деп хабарлайды Azattyq Rýhy Stopfake.kz сайтына сілтеме жасап.

Әлеуметтік желілерде 2026 жылдан бастап Газа тұрғындарын кезең-кезеңімен эвакуациялап, Қазақстан, Өзбекстан және Тәжікстанға орналастырылады деген мазмұндағы жазбалар тараған. Бұл хабарламаларда Сауд Арабиясының мұрагер ханзадасы осындай бастама көтерді деп көрсетілген.

Алайда ҚР Сыртқы істер министрлігі бұл ақпаратқа қатысты ресми пікір білдірді.

«Аталған жаңалық шындыққа сәйкес келмейді. Ресми дереккөздерге ғана сенім артуыңызды сұраймыз», – деп мәлімдеді министрлік өкілдері.

Газа туралы жалған ақпараттар жиілеп кетті

Бұған дейін де Газа секторындағы әскери іс-қимылдарға және босқындар мәселесіне қатысты түрлі фейк ақпараттар тараған болатын. Бұл жолы да халықаралық көші-қонтақырыбы әлеуметтік желілерде манипуляция құралына айналып отыр.

Фейк ақпаратта не айтылған:

• 2026 жылдан бастап Газа тұрғындары эвакуацияланады
• Олар Қазақстан, Өзбекстан және Тәжікстанға орналастырылады
• Мұндай ұсынысты Сауд Арабиясы ханзадасы жасаған

Ресми ақпаратты тексеру

Сыртқы істер министрлігі жалған ақпараттың таралуына алаңдаушылық білдіріп, азаматтарды тек ресми арналарға сенуге шақырды. Жалған мәліметтер қоғамда арандатушылыққа және кері пікір қалыптастыруға әсер етеді.

2023 жылдан бері Газа секторындағы қақтығыстар туралы жалған ақпараттар жиі тарап келеді. Босқындарды әртүрлі елдерге орналастыру туралы ресми түрде расталмаған мәліметтер қоғамдық пікірге әсер етіп, этникалық және саяси шиеленістерге негіз болуы мүмкін. Қазақстан гуманитарлық көмек көрсеткенімен, босқындарды көшіру туралы шешім қабылданбаған.