Ақтауда аялдама жанында тұрған ер адамды автобус басып кетті

Ақтау қаласының 8А ықшамауданындағы «Рахат» аялдамасында 18 маусым күні сағат 18:00 шамасында ауыр жол-көлік оқиғасы тіркелді. Бұл туралы Azattyq Rýhy агенттігі Lada.kz-ке сілтеме жасап хабарлады.

Куәгерлердің айтуынша, қоғамдық көлік жолаушыларды түсіру үшін аялдамадағы кіреберіс тұстан кірген кезде сол жерде тұрған екі ер адамның бірін қағып кеткен.

Ауыр жарақат алып, қан көп жоғалтқан

Автобус дөңгелегінің астында қалған ер адам ауыр жарақат алып, жерде қан ізі қалған. Оқиға орнына дереу жедел жәрдем шақырылды.

Маңғыстау облыстық жедел және шұғыл медициналық жәрдем станциясының баспасөз қызметі хабарлағандай, шақырту сағат 17:53-те тіркелген. Жедел жәрдем бригадасы зардап шеккен адамды шұғыл түрде облыстық ауруханаға жеткізді.

Зардап шеккен адам «қызыл аймаққа» ауыстырылды

Сағат 18:46-да науқас жағдайы өте ауыр болғандықтан, ол «қызыл аймаққа», яғни өміріне қауіп төніп тұрған науқастарға арналған бөлімшеге ауыстырылды. Қазіргі уақытта дәрігерлер оның өмірі үшін күресіп жатыр.

Тиісті органдар тергеу жүргізіп жатыр

Оқиғаның нақты мән-жайы анықталуда. Қоғамдық көлік жүргізушісінің іс-әрекеті мен қауіпсіздік талаптарының сақталған-сақталмағаны бойынша тиісті тергеу жүргізіледі.