Алакөлде серфингпен жүзіп жүрген екі адам аударылып, суға кетіп қала жаздады

Абай облысына қарасты Мақаншы ауданындағы Алакөл көлінде екі адам қатты толқын кезінде серфинг тақтасымен бірге аударылып, өз бетінше жағалауға шыға алмаған. Бұл туралы Төтенше жағдайлар министрлігі мәлім етті, деп хабарлайды Azattyq Rýhy.

Құтқарушы дер кезінде көмекке келді

2005 және 2006 жылы туған екі адам толқынның күшімен су ортасында қалып қойған. Жағдай туралы хабар түскен соң, құтқарушы гидроциклмен дереу оқиға орнына жетіп, екеуін су ішінен шығарып, жағаға аман-есен алып шықты.

«Медициналық көмек қажет болған жоқ», – деп мәлімдеді ТЖМ.

Ел бойынша шомылуға рұқсат етілген 698 орын бар

ТЖМ мәліметінше, Қазақстанда 698 ресми шомылу орны тіркелген. Оның ішінде:

• 458 жеке меншік жағажай;
• 227 коммуналдық жағажай;
• 13 туристік және спорттық нысан.

Сонымен қатар, тағы 84 жаңа шомылу орнын ашу бойынша жұмыс жүргізілуде.

Қауіпсіздік ережелерін есте сақтаңыз:

• Балаларды су жағасында қараусыз қалдырмаңыз;
• Қайықпен, катамаранмен немесе SUP-тақтамен серуендегенде құтқару жилетін киіңіз;
• Ауа райы мен желдің жағдайына назар аударыңыз.