Балқашта экс-полицей бұрынғы әйелін аяусыз соққыға жықты деген күдікке ілінді

Қарағанды ​​облысындағы Балқаш қаласының тұрғыны бұрынғы күйеуін әрдайым ұрып-соғып, азаптады деп айыптады. Жәбірленуші әйелдің туыстарының үндеуі әлеуметтік желіде жарияланды, деп хабарлайды Azattyq Rýhy.

Үйге баса-көктеп кірген

Жазбада ер адамның полиция қызметкері екені, ажырасқаннан кейін де бұрынғы әйелінің мазасын алуды тоқтатпағаны айтылған.

Кезекті бір оқиға 4 мамырда болған. Жазба авторы ер адам таңғы сағат төртте бұрынғы әйелінің үйіне баса-көктеп кіріп, оны аяусыз ұрып-соғып, буындырғанын, мазақ етіп, өлтірмек болғанын айтады. Сол күні таңертең ол полицияға арыз жазған.

Осы жағдайдан кейін әйел ауруханаға түсті. Автордың айтуынша, ер адам бұрынғы әйелі емделіп жатқан ауруханаға емін-еркін кіріп, оны қорқытып жүр.

Жәбірленушінің отбасы қоғамнан қорғауды сұрап, полициядан әділ тергеуді талап етіп отыр.

Қарағанды ​​облысының полиция департаменті бұл үндеуге жауап беріп, күдіктінің қазір құқық қорғау органдарында қызмет етпейтінін атап өтті.

"Балқаш тұрғынының бұрынғы күйеуі соққыға жыққаны туралы арызы бойынша қылмыстық іс қозғалды. Күдікті – бұрынғы полиция қызметкері тергеу үшін полиция бөліміне жеткізілді. Алдын ала мәлімет бойынша жанжал мүліктік дау салдарынан туындаған. Сотқа дейінгі тергеу амалдары жүргізілуде», - деп хабарлады полиция.

Заң бәріне ортақ

Полиция департаменті «оқиғаның мән-жайын жан-жақты, толық және объективті анықтауға бағытталған барлық қажетті тергеу әрекеттері жүргізіліп жатыр» деп сендірді.

"Заң бәріне ортақ. Тамыр-таныстық та, бұрынғы мәртебе де иммунитет бермейді. Іс Қарағанды ​​облысының полиция департаменті басшылығының ерекше бақылауында", - деп атап өтті ведомство.