Павлодарға 40 мыңжылдық мамонт сүйегі әкелінеді

Павлодарға Новосібір қаласынан ұлттық, классикалық музыкалық және театр өнерінің үздік үлгілерімен бірге бірегей мәдени мұра объектілері жеткізіледі. Олардың ішіндегі ең ерекше экспонат – жүнді мамонттың ең толық сақталған қаңқасы. Бұл туралы Azattyq Rýhy агенттігі Pavlodarnews.kz-ке сілтеме жасап хабарлайды.

Бұл мамонт 2011 жылы Ресейдің Новосібір облысына қарасты Чанов ауданынан табылған. Қазіргі уақытта ол Новосібір өлкетану мұражайының қорында сақтаулы.

Мамонтқа «Самсон» есімі берілген

«Бұл – әлемдегі ең толық сақталған еркек мамонт қаңқасы. Енді ол Павлодарға жол тартып, сібірліктердің қуатты энергиясын осы өңір тұрғындарына жеткізеді», — деді Новосібір облысының мәдениет министрі Юлия Шуклина.

Мамонттың көлемі мен жасы таң қалдырады

Мамонт Самсонның қаңқасы ерекше үлкен. Оның ұзындығы – 5,5 метр, ал биіктігі үш метрден асады. Ғалымдардың мәліметінше, жасы шамамен 40 мың жыл.

Экспонаттың ірі көлеміне байланысты ол Павлодардағы «Ertis» мұражайының арнайы жеке залында орналастырылады.

«Мамонт жексенбі күні әкелініп, орнату жұмыстары сол күні басталады. Келушілер үшін тегін болады», – деді Потанин атындағы тарихи-өлкетану музейінің директоры Арман Әлиакпаров.

Мамонт көрмесі – Новосібір күндерінің аясында

Павлодарда Новосібір облысының күндері 26-28 мамыр аралығында өтеді. Алайда ұйымдастырушылар мамонт көрмесін ұзағырақ уақыт көрсетуге ниетті.