Астанада саябақ болады деген жерге медорталық салынып жатыр

Астанада саябақ салынады деген жерге жекеменшік медицина орталығы бой көтеріп жатыр, деп хабарлайды Azattyq Rýhy.  

Бес тиын қажеті жоқ

КТК-ның хабарлауынша бұған тұрғындар әкімдікке наразы. Тұрғындар жекеменшік нысанның пайдасынан гөрі, зияны көп дейді.

«Бір жыл бұрын қала әкімі Қасымбек осы жерде саябақ болады деп айтқан. Оны Есіл әкімшілігі құлаққа да қыстырған жоқ. Мына жолдың түрін көріп тұрсыздар. Осы құрылыстың қоқысын осы жерге тастайды. Бізге бұның бес тиын қажеті жоқ», - дейді Айгүл Андабекова.

Ал Зибагүл Қаринаның айтуынша  құрылыс коммуникацияға  салмақ түсіреді.

«Емхана салынса, ол халық үшін емес, жекеменшік болайын деп отыр. Оған ақшалы, қалталы азаматтар ғана келе алады», - дейді ол.

Жоспар өзгерді

Қала әкімі тұрғындармен онлайн кездесуінде бұл жерге саябақ салуға уәде берген көрінеді. Алайда бір жыл өткенде жоспар өзгеріпті. Тұрғындар тар көшеде көлік қозғалысы қиындап, емделуге келушілердің кесірінен кептеліс күшеюі мүмкін дейді. Ал әкімдік бұл жерге саябақ пен медициналық орталық салу қоғамдық талқылауда мақұлданғанын айтады.

«2025 жылғы 7 ақпандағы Астана қаласы әкімдігінің қаулысына сәйкес, «Бұқар жырау Астана» ЖШС-не жалпы ауданы 0,4 га болатын «Медициналық орталық және сквер» нысаны бойынша іздестіру және жобалау жүргізу үшін үш жыл мерзімге рұқсат берілді. Сонымен қатар құрылыс салушыға сәулет-жоспарлау тапсырмасы беріліп, эскиз жоба келісілді», - дейді Астана қаласының құрылыс басқармасы.