Қостанайда жүргізуші куәлігінсіз жүрген 30-ға жуық адам мопедінен айырылды
Мопед айдау үшін А1, А немесе В санатындағы жүргізуші куәлігі болуы керек
Қостанайда жүргізуші куәлігінсіз қала көшелерінде емін-еркін жүрген 30-ға жуық адам мопедінен айырылды, деп хабарлайды Azattyq Rýhy.
Іс-шаралар барысында мопед жүргізушілері жасаған 73 құқық бұзушылық анықталды. Олардың ішінде масаң күйде жүргізудің 4 жағдайы, тіркелмеген техниканы пайдаланудың 15 фактісі, техникалық ақаулы мопедтерді жүргізудің 7 фактісі. Сонымен қатар, 27 адам жүргізуші куәлігінсіз мопед жүргізген.
Полиция қызметкерлері 5 сәуірден бастап мопедтер ресми түрде механикалық көліктерге теңестірілгенін және оларды басқару үшін А1, А немесе В санатындағы жүргізуші куәлігі, техникалық тексеруден өту және азаматтық-құқықтық жауапкершілікті сақтандырудың болуы қажет екенін еске салады.
«Қостанай облысында бүгінгі таңда 1384 мопед тіркелген. Полицейлер жаңа талаптарды сақтаудың маңыздылығын атап көрсетеді – бұл тек заңдылық мәселесі ғана емес, сонымен қатар жүргізушілер мен айналасындағылардың жеке қауіпсіздігі», - делінген облыстық ПД хабарламасында.
