Алматы облысында ойнап жүріп жоғалып кеткен екі бала таудан табылды
Олардың біреуі 10, екіншісі 5 жаста
Алматы облысының Талғар ауданында ойнап жүріп жоғалып кеткен екі бала құтқарушылардың көмегімен табылды, деп хабарлайды Azattyq Rýhy ҚР Төтенше жағдайлар министрлігіне сілтеме жасап.
30 сәуір күні кешке 2020 және 2015 жылы туған бауырлар үйінің жанында ойнап жүріп, көзден таса болған. Ата-анасы оларды өз бетінше іздеп таба алмаған соң, 112 нөмірі арқылы көмек сұраған.
Іздестіру жұмыстары түнде бірден басталды. Оған ТЖМ-нің құтқарушылары, полиция қызметкерлері, екі кинологиялық есеп, дрон, сондай-ақ жергілікті тұрғындар мен туыстары жұмылдырылды.
«Бес жастағы ұл бала үйінен шамамен үш шақырым жердегі таулы аумақтан түнде табылды. Ал он жастағы қыз бала таңертең 10 шақырым қашықтықтан, сондай-ақ таулы аймақтан табылды», – деп мәлімдеді министрлік.
Дәрігерлер балаларды қарап шықты. Қазіргі уақытта олардың жағдайы жақсы, ата-анасына тапсырылды.
ТЖМ өкілдері ата-аналарға балаларды қараусыз қалдырмауға, әсіресе таулы немесе қол жетуі қиын аумақтарға жақын жерлерде ерекше сақ болуға кеңес береді.
