Шымкентте 6 жыл бойы алимент төлемеген адамнан 8 миллион теңге өндірілді
Аталған тұлға бірнеше рет сот шешімін орындамаған
Шымкент қаласының прокурорлары 8 миллион теңгеге жуық алимент қарызын өндіріп алды, деп хабарлайды Azattyq Rýhy қала прокуратурасының баспасөз қызметіне сілтеме жасап.
Тексеру барысында азамат «О»-ның 6 жыл бойы өз балаларына алимент төлемей, 7 905 638 теңге қарыз болғаны анықталды.
«Аталған тұлға бірнеше рет сот шешімін орындамағаны үшін әкімшілік жауапкершілікке тартылған», — делінген хабарламада.
Прокуратура бұл деректі ҚР Қылмыстық кодексінің 139-бабы бойынша сотқа дейінгі тергеп-тексерулердің бірыңғай тізіліміне тіркеп, іс материалдары сотқа жолданған.
Сот отырысы барысында борышкер жәбірленуші тараппен татуласып, толық қарыз сомасын — 7 905 638 теңгені өтеген. Осыған байланысты қылмыстық іс ақталмайтын негіздер бойынша тоқтатылғаны хабарланды.
