«Бастысы пакет толтыру»: Астанада гүл көрмесінде әйел мүк ұрлап әкетпек болған (ВИДЕО)

Астанада өткен халықаралық гүл көрмесінде келушілердің бірі мүкті рұқсатсыз алып кетпек болған сәті видеоға түсіп қалды, деп хабарлайды Azattyq Rýhy. 

Видеоны denski_blog атты Instagram парақшасы жариялаған. Кадрда бір әйелдің мүкті пакетке салып жатқанын көруге болады. Видео авторы бұл әрекетке:

«Біздің менталитет туралы барлығын осы видео айтып тұр. Керек пе, керек емес пе – үйде көреміз. Бастысы – пакет толтыру»,– деп пікір білдірген.

Бірнеше секундтан соң көрме қатысушыларының бірі – шетелдік әйел келіп, мүк ақылы екенін түсіндіреді. Бұдан кейін жергілікті келуші мүкті пакеттен шығарып, орнына қайта қояды.

Видео астына жазылған пікірлерде көптеген қолданушы бұл әрекетті ұятты жағдай деп бағалады: «Ұят болды тағы да», «Неге осындайлар бізде көп? Қарасаң, үлкен кісілер – не мерекеде, не осындай шарада – халява көрсек болды», «Көрменің беделін түсірдік…» деп жазып жатыр олар.