Мемлекет 2 млн гектардан астам жерді меншігіне қайтарды
Осыншама жер осы уақытқа дейін неге бос жатқаны белгісіз
Ауыл шаруашылығы министрі Сапархан Омаров онлайн түрде өткен есеп беру кездесуінде 2020 жылдың үш айында 2 млн гектар жер мемлекет меншігіне өтті деп хабарлады.
Министрдің айтуынша, еліміз бойынша бос жатқан жерлерді бақылап отыруға болатын веб-портал пайда болған. Ілкі жобаның арқасында Ақмола, Қостанай, Шығыс Қазақстан және Маңғыстау облыстарында жалпы ауданы 7,3 млн гектар 9 мыңнан аса құр жатқан жайылым анықталған.
«2020 жылдың үш айында мемлекет меншігіне 2 млн гектардан астам жер телімі қайтарылды», - деді Сапархан Омаров.
Бос жатқан жердің көбі, дәлірек айтсақ, 2,5 млн гектары Маңғыстау облысының аумағында жатыр. Қостанай облысынан – 1,9 млн гектар, Ақмола облысынан – 1,6 млн гектар, Шығыс Қазақстан облысынан 1,3 млн гектар бос жатқан жер табылған. Олар қашан мемлекет меншігіне өтетіні әзірге белгісіз.
Кенжекей Тоқтамұрат, Нұр-Сұлтан
