LRT құрылысы: алғашқы алты вагонның негізгі жұмыстары аяқталды

Астанадағы жеңіл рельсті көлік (LRT) жобасы аясында алғашқы алты вагонның негізгі құрастыру жұмыстары аяқталды. Бұл туралы City Transportation Systems (CTS) компаниясының баспасөз қызметі жазды, деп хабарлайды Azattyq Rýhy. 

«Жалпы жоба бойынша 19 вагон жоспарланған, оның ішінде алтауы құрастырылып жатыр. Соның ішінде екі вагонның негізгі құрастыру кезеңдері толық аяқталған. Атап айтқанда, бояу жұмыстары жүргізіліп, терезелер мен есіктер орнатылған, ішкі әрлеу, еден, шатыр, кондиционер, жарықтандыру, мультимедиа және мониторлар жүйесі орнатылған», — делінген хабарламада.

Қазір бұл вагондарға дөңгелек, аспа жүйесі мен жүріс бөлігі орнатылуы тиіс. Ал қалған төрт вагон қаптамалық құрылымдарын жинау кезеңінде. Барлық өндірістік жұмыстар халықаралық стандарттарға сай жүзеге асырылып, қатаң техникалық бақылаумен қамтамасыз етілуде.

«LRT пойыздары толықтай автоматтандырылған, жүргізушісіз жұмыс істейтін болады. Олар GOA 4 деңгейіндегі заманауи басқару жүйесімен жабдықталады. Бұл жүйе қозғалысты автоматты түрде басқарып, техникалық жағдайды бақылауға және соқтығыстардың алдын алуға мүмкіндік береді», — делінген компания хабарламасында.

Алғашқы вагондар 2025 жылдың қыркүйегінде Астанаға жеткізіледі, одан кейін сынақ режиміндегі іске қосу кезеңі басталады.