Шетелдің үш азаматы Қазақстанға келіп, онлайн алаяқтықпен айналыспақ болған
Олардан алаяқтар кеңінен қолданатын аппараттар тәркіленді
Алматыда үш шетелдік азаматты ұсталып, олардың жалға алған пәтерін тінту кезінде алты SIM-бокс анықтап, тәркіленді, деп хабарлайды Azattyq Rýhy.
Бұл құрылғылар алаяқтық схемаларда кең көлемде қоңыраулар жасау, хабарламалар жіберу және абоненттік нөмірлерді өзгерту үшін қолданылады.
Қаржылық мониторинг агенттігінің мәліметінше, олардан әртүрлі мобильді операторлардың 5 мыңнан астам SIM-картасы тәркіленді.
«Аталған тұлғаларға қатысты ҚР Қылмыстык кодексінің 213-бабы 2-бөлігі бойынша – «ұялы байланыс абоненттік құрылғысының идентификациялық кодын заңсыз қолдану, абонентті сәйкестендіру құрылғысын заңсыз өзгерту және идентификациялық кодты өзгертуге арналған бағдарламаларды жасау, пайдалану, тарату» қылмыстық іс тіркелді.
Күдіктілер екі ай мерзімге қамауға алынды. Олардың интернет-алаяқтыққа қатыстылығы тексерілуде.
ҚР ҚІЖК-нің 201-бабына сәйкес өзге де ақпарат жариялауға жатпайды», - делінген хабарламада.
