Талдықорғанда өрттен 63 жастағы ер адам құтқарылды

Талдықорған қаласына қарасты Өтенай ауылында жеке тұрғын үй мен шаруашылық ғимаратынан өрт шықты, деп хабарлайды Azattyq Rýhy Төтенше жағдайлар министрлігіне сілтеме жасап.

Өрт сөндірушілер тез арада оқиға орнына жетіп, 90 шаршы метр аумақты шарпыған жалынды ауыздықтады. Тілсіз жауды сөндіру кезінде 63 жастағы үй иесі құтқарылып, жедел жәрдем қызметкерлеріне тапсырылды.

Сондай-ақ, құтқарушылар үш бірдей 20 литрлік газ баллонын сыртқа шығарып, жарылыстың алдын алды.

«Өрт сөндірушілердің жедел әрі кәсіби әрекеттерінің арқасында бір адамның өмірі құтқарылып, оттың кеңінен таралуы мен газ баллондардың жарылуына жол берілген жоқ», – делінген ведомство хабарламасында.