«Ол бәрібір өледі»: жедел жәрдем қызметкерлері науқасты қарамай, үйінің кіреберісінде тастап кеткен (ВИДЕО)

Әлеуметтік желіде жедел жәрдем қызметкерлерінің науқасты ғимараттың кіреберісінде қалдырғаны туралы видео тарады. Бейнежазбада дәрігерлердің «Ол бәрібір өледі, оны ешкім қабылдамайды» деген сөздері естіледі. Бұл оқиға қоғамда дау-дамай тудырды, деп хабарлайды Azattyq Rýhy NOVA24.uz сайтына сілтеме жасап.

Өзбекстан Денсаулық сақтау министрлігі таратқан мәліметке сәйкес, 72 жастағы әйел адам – тұрақты тұрғылықты жері жоқ азамат – жедел жәрдем қызметіне бірнеше рет хабарласқан.

6 наурыз күні таңғы 10.00-ден кешкі 20.00-ге дейін оның атына төрт қоңырау тіркелген. Жедел жәрдем бригадасы науқасты №4 және №1 қалалық клиникалық ауруханаларға жеткізген.
Алайда оған шұғыл медициналық көмек қажет болмағандықтан және тұрақты мекенжайы жоқтығынан, науқас қайтадан бастапқы мекенжайына жеткізілген.

Оқиғаның мән-жайын анықтау үшін тиісті органдар тексеру жұмыстарын жүргізіп жатыр.