«Ринг патшасы - 2019» турнирі өтті
Жарысқа қатысушылардың жас ерекшелігі жағынан ең үлкені - Адик Бермешов 64 келі салмақ дәрежесінде жеңімпаз атанды
Петропавлда бокс ардагерлері арасында «Ринг патшасы-2019» ашық турнирі өтті. 63 жастағы зейнеткер Адик Бермешов 64 келі салмақ дәрежесінде жеңімпаз атанды, - деп хабарлайды «Azattyq ruhy» тілшісі.
«Ринг патшасы» турнирі Нұр-Сұлтан, Алматы, Ақтобе, Атырау, Балқаш, Қарағанды, Павлодар, Теміртау, Тараз, Шымкент, Екібастұз, Қарағанды мен Солтүстік Қазақстан облыстары және Ресейдің Омбы, Кемерово қалаларынан келген 32 боксшының басын қосты. Тартысты бәсеке үш күн бойы жалғасты.
«Ринг патшасы» турнирі осымен 3-ші рет ұйымдастырылып отыр. Жыл сайын ауқымы кеңейіп келеді. Жарыс 6 салмақ дәрежесі бойынша өтіп жатыр. Турнир келесі жылы да жалғасын табады», - деді WBA тұжырымы бойынша бұрынғы әлем чемпионы, турнирді ұйымдастыру алқасының мүшесі Жанат Жақиянов.
Жарысқа қатысушылардың жас ерекшелігі жағынан ең үлкені Адик Бермешов 64 келі салмақ дәрежесінде жеңімпаз атанды. Кешегі КСРО спорт шебері, бүгінде 63 жастағы зейнеткер өзінен 30 жас кіші боксшылардан басым түсті.
«Мен өмір бойы спортты жаныма серік етіп келемін. Жүгіремін, жүзумен айналысамын. Жасөспірімдер спорт мектебінде балаларды баптаймын. Ертең туған күнім. Өзіме жақсы сыйлық жасадым», - деді жарыс жеңімпазы.
Айта кетейік, жарыстың жүлде қоры 1 млн. 800 мың теңге. Жеңімпаздарға әр салмақ дәрежесі бойынша белдіктер табысталды.
