«Араларында спортшылар мен спорт шеберлері бар»: 18 оқушы қолынан қаза тапқан балаға қатысты сот отырысы өтеді

Ертең Ақтөбе қаласындағы кәмелетке толмағандардың істері жөніндегі мамандандырылған ауданаралық сотында алғашқы сот отырысы өтеді. Істі судья Ж.Бекенова жүргізеді, деп хабарлайды Azattyq Rýhy.

2023 жылғы 2 қыркүйекте Ақтөбе облысы, Темір ауданы, Қопа ауылында 14 жастағы Сыдық Нұржанды жоғары сынып оқушылары соққыға жыққан. Марқұмның апасының айтуынша, оқиға кезінде 18 адам болған, ал шабуыл жасағандар арасында спортшылар мен спорт шеберлігіне үміткерлер де бар. Бір оқушы жедел жәрдем шақырғанымен, Нұржанның анасы оны оқиға орнында өлі күйінде тапқан.

Қоғам белсендісі Дина Таңсәрінің айтуынша, тергеушілер мен прокуратура істің саралануын бірнеше рет өзгерткен:

• Бастапқыда іс «Абайсызда жәбірленушінің өліміне әкеп соққан денсаулыққа қасақана ауыр зиян келтіру» бабы бойынша қаралды.
• Кейіннен «Кісі өлтіру» бабына ауыстырылды.
• Соңында қайтадан «Абайсызда адам өліміне әкеп соққан денсаулыққа қасақана ауыр зиян келтіру» деп өзгертілді.

Айыпталушылар қатарында 18 адам бар:

• 5 оқушы (11-сынып) — 293-бап («Бұзақылық») және 106-бап («Абайсызда адам өліміне әкеп соққан денсаулыққа қасақана ауыр зиян келтіру») бойынша айыпталуда.
• 1 оқушы (10-сынып) — 106-бап («Абайсызда адам өліміне әкеп соққан денсаулыққа қасақана ауыр зиян келтіру») бойынша айыпталуда.

Сонымен қатар жеті 9-сынып оқушысы мен бес 10-сынып оқушысы да жәбір көргені анықталды.