Теміртауда бойжеткен айналасындағы жұртқа оқ жаудырды ма? Полиция түсініктеме берді
Оқиғаға 27 ақпанда 09:40 шамасында болған
Әлеуметтік желіде Теміртау орталығында бойжеткеннің тапаншадан оқ атқаны туралы ақпарат жарияланды. Бұл ақпаратқа облыстық полиция түсініктеме берді, деп хабарлайды Azattyq Rýhy.
Бұл ақпарат Instagram әлеуметтік желісіндегі temirtau.city парақшасында жарияланды.
«Абай көшесінің бойында, Металлурговқа жақын жерде бір қыз тапаншамен адамдардың бетіне оқ атты», - делінген әлеуметтік желіде жарияланған видеоның жазбасында.
Редакция түсініктеме алу үшін Қарағанды облысының полиция департаментінің баспасөз қызметіне хабарласты. Полицейлер қыздың Теміртау көшелерінде қару қолданғаны туралы ақпаратты растаған жоқ. Бұл ақпарат шындыққа жанаспайды.
«Биыл 27 ақпанда сағат 09:40 шамасында Теміртау қаласындағы Металлург даңғылы мен Абай көшесінің қиылысында Hyundai Palisade және Hyundai Santa Fe автокөліктерінің жүргізушілері арасында жол қауіпсіздігі ережелерін сақтамау салдарынан ауызша жанжал шыққан. Оның барысында Hyundai Santa Fe көлігінің 36 жастағы жолаушысы Hyundai Palisade көлігінің 34 жастағы жүргізушісіне қарсы Tula A+A аэрозольін қолданған», - деп хабарлады облыстық ПД.
Бұзақылық фактісі бойынша қылмыстық іс қозғалды. Оқиғаға қатысушылар полиция бөлімшесіне жеткізіліп, тергеу амалдары жүргізілуде.
