Өзбекстанда қарақшылық жасаған Түркияның үш азаматы Қазақстанда қолға түсті

Өзбекстан аумағында қарақшылық шабуыл жасағаны үшін іздеуде жүрген Түркияның үш азаматы Қазақстан әуежайында қолға түсті. Бұл туралы Azattyq Rýhy агенттігі Polisia.kz-ке сілтеме жасап хабарлайды.

Іздеуде жүрген түркиялықтарды Шымкент пен Атырау әуежайларында криминалдық полиция қызметкерлері ұстады.

Олар Ташкентте бетперде тағып, бөтен біреудің көлігін басып алуға тырысқан. Алайда жәбірленушілердің қарсылығының арқасында қылмыстық жоспарын жүзеге асыра алмаған.

Осылайша олар оқиға орнынан ізін суытқан. Қарақшылық жасалғаннан кейін, іздеуге жарияланбастан бұрын қаскөйлердің екеуі Атырау облысында, ал үшіншісі Қазақстанның оңтүстігінде жасырынған.

Жедел іс-шаралардың нәтижесінде үш күдікті де ұсталып, уақытша ұстау изоляторларына қамауға алынды.