АҚШ пен Ресей Украина мәселесі бойынша Сауд Арабиясында кездесу өткізіп жатыр

18 ақпанда Эр-Риядта Ресей мен Америка Құрама Штаттары делегациялары арасында Украина мәселесі бойынша келіссөздер басталды, деп хабарлайды Azattyq Rýhy.

Кездесу корольдік сарайлардың бірі – Дирияда өтіп жатыр.

РИА Новости агенттігінің хабарлауынша, келіссөздерге Ресей тарапынан сыртқы істер министрі Сергей Лавров пен президенттің көмекшісі Юрий Ушаков қатысып жатыр. Америка Құрама Штаттарының атынан мемлекеттік хатшы Марко Рубио, Ұлттық қауіпсіздік жөніндегі кеңесші Майк Уолтц және арнайы өкіл Стив Уиткофф бар.

Кездесу, ең алдымен, Ресей-Америка қарым-қатынастарын қалпына келтіруге арналған.

Осыған дейін Владимир Путин мен Дональд Трамптың кездесуі ақпан айының соңында Сауд Арабиясында өтуі мүмкін екені хабарланған болатын.