25 жыл бұрын екі адамды жазым қылған қылмыскерлер сот алдына келді

Батыс Қазақстан облысының қылмыстық істер жөніндегі мамандандырылған сотында 25 жыл бұрын жасалған қос кісі өлтіру ісі бойынша алдын ала тыңдау өтті, деп хабарлайды Azattyq Rýhy «Мой Город» порталына сілтеме жасап.

Айыпталушылар орнында 53 жастағы Асқар Батыров пен 50 жастағы Әлібек Сармағамбетов отыр. Оларға Қылмыстық кодекстің 99-бабының 2-бөлігі («Алдын ала сөз байласу арқылы бір топ адам жасаған екі немесе одан да көп адамды өлтіру») бойынша айып тағылған.

Қорғау тарапының уәжі

Сармағамбетовтың адвокаттары істі прокуратураға қайтаруды сұрап, бірнеше өтініш берді. Олардың айтуынша, сотталушы мен қорғаушы тараптың құқықтары бұзылған: іс материалдарымен толық танысуға мүмкіндік болмаған. Сондай-ақ қорғаушылар Батыровтың куәгерлік айғақтарын бірнеше рет өзгерткені, бір куәгердің сотталушыға жеке өшпенділігі бары айтылғанын алға тартты.

Айыптау нұсқасы

Прокурор Жұманов оқыған айыптау актісіне сәйкес, Батыров пен Сармағамбетов бұған дейін сотталған. Прокурордың айтуынша, 2000 жылдың жазында Сармағамбетов пен Жымпиты ауылының тұрғындары – Сатиев пен Шәріпов арасында жанжал туындап, Сатиев айыпталушыға күш қолданған. Осыған байланысты Сармағамбетов екеуін өлтіруге шешім қабылдаған.

Желтоқсан айында ол Батыровтан қылмысты орындауға адам тауып беруін сұрайды. Сол кезде Батыров жазасын бірге өтеген Сәрсеновке (2010 жылы қайтыс болған) ұсыныс жасаған.

Қылмыс қалай жасалған?

Қылмыс жасалған күні Батыров Шәріповтен өзін және Сәрсеновті қалаға жеткізуді өтінген. Ружейников көшесіндегі №9 үйдің жанында Батыров жүргізушіден тоқтауын сұрап, артқы орындыққа отырады. Сол кезде ол Шәріповтің басына шолақ мылтықпен оқ атқан. Қасында отырған Сатиевке үш рет оқ жаудырған. Кейін Сәрсенов олардың әрқайсысының басынан бір реттен атқан, алайда екеуі бірінші оқтан-ақ қаза тапқан.

Бұл қылмысы үшін Сармағамбетов сол жылы Сәрсеновке 50 мың доллар төлеген, ал Батыровқа 2018-2022 жылдар аралығында 30 миллион теңге берген.

Судья сотталушылардан «істі алқабилер қарауын қалайсыздар ма?» деп сұраған. Қорғаушылар үзіліс сұрады. 18 ақпанда сот судьяға түскен өтініштер бойынша шешім шығарады.