«Тальго» пойызында зорланған қызға ҚТЖ 3 миллион теңге төлейтін болды

«Тальго» пойызында зорланған қызға қатысты іс жалғасын тауып, бүгін жаңа үкім шықты, деп хабарлайды Azattyq Rýhy.

«Бүгін сот «Жолаушылар тасымалы» АҚ-ны уәде етілген қауіпсіздікті қамтамасыз етпегені үшін кінәлі деп тауып, зардап шеккен әйелге 3 миллион теңге моральдық шығынды өтеу туралы шешім шығарды. «Қазақстан темір жолы» ұлттық компаниясы жауапкершіліктен қашып, бәрін еншілес компаниясы «Жолаушылар тасымалы» АҚ ғана жауып отыр», – деп жазады Дина Таңсәрі өзінің Telegram-дағы парақшасында. 

Дәл осындай соманы – 3 миллион теңгені ұлттық компания медиациялық келісімде ұсынған, бойжеткен одан бірден бас тартты. 

Қоғам белсендісінің айтуынша, жолсеріктер зорлық-зомбылық көрсеткеннен кейін араға бір жыл салып жазаланған. Жетес Үмбеталиев пен Қолқанат Құрманиязов 5 жылға бас бостандығынан айырылды, бірақ қазір олар бостандықта, біреуі шартты түрде босатылды.

«Жәбірленуші тарап, яғни біздің клиентіміз 832 миллион теңге көлемінде өтемақы талап етті - ол емделуге кеткен ақыны, бизнесі мен табысынан айырылуына байланысты шығынды есептеп шыққан», – делінген хабарламада.