Қазақстанда Samsung теледидарлары шығарылады
Алғашқы отандық өнімдер 2025 жылдың екінші тоқсанында сатылымға шықпақ
Қазақстанда Samsung теледидарларын шығару басталады, деп хабарлайды Azattyq Rýhy Үкіметтің баспасөз қызметіне сілтеме жасап хабарлады.
Samsung Electronics Central Eurasia президенті Юджин Джонг пен ҚР Премьер-Министрінің бірінші орынбасары Роман Склярдың кездесуі барысында Қазақстанда Samsung теледидарларын құрастыруға байланысты келісімге қол қойылды.
«Роман Скляр жергілікті өндірушілерді жаһандық жеткізу тізбегіне интеграциялау, өндірісті кеңейту және шығарылатын өнім түрлерін көбейту бойынша жұмыстарды жалғастырудың маңыздылығын атап өтті», – деп хабарлайды Үкімет.
Осы кездесудің нәтижесінде Samsung Electronics Central Eurasia мен Silk Road Electronics зауыты арасында келісім жасалып, алғашқы қазақстандық Samsung теледидарлары 2025 жылдың екінші тоқсанында сатылымға шығатыны белгілі болды.
Жоба аясында Қазақстандағы машина жасау саласының дамуына серпін беріліп, жаңа жоғары білікті жұмыс орындары ашылады. Сонымен қатар бұл бастама елдегі тұрмыстық техника өндірісін дамытуға және Samsung компаниясымен ұзақ мерзімді ынтымақтастық орнатуға мүмкіндік береді.
Кездесу барысында өндіріс саласындағы басқа да мәселелер мен екіжақты кооперацияны кеңейту перспективалары талқыланды.
