Қазақстанда қай өңірде қылмыс ең көп жасалады

Қазақстанда қылмыс қай өңірлерде аз және көп жасалатыны белгілі болды. Бас прокуратураның Құқықтық статистика және арнайы есепке алу жөніндегі комитетінің мәліметіне сәйкес, жалпы қылмыс 5,3%-ға (140 272-ден 132 778-ге) төмендеген, деп хабарлайды Azattyq Rýhy.

Ведомство мәліметінше, өсу Маңғыстау облысында 12,2%-ға (3097-ден 3474-ке), Атырау облысында 8,5%-ға (4283-тен 4647-ге), Павлодар облысында 5,6%-ға (5039-дан 5322-ге), Қызылорда облысында 4,6%-ға (2871 – 3003), Ұлытау облысында 2,8%-ға (1278-ден 1314-ке), Алматы облысында 1,6%-ға (10223-тен 10385-ке) және Ақмола облысында 0,7%-ға (5084-тен 5120-ға) дейін байқалады.

Ең көп қылмыс Алматы – 24 965 (18,8%) және Астана қалаларында – 17 339 (13,1%), Алматы – 10 385 (7,8%) және Қарағанды – 7 562 (5,7%) облыстарында жасалған.

«Қылмыстық құқық бұзушылықтардың жалпы санынан 34% алаяқтық (45 156), 23% – ұрлық (30 593), 6,3% – есірткі қылмысы (8 363), 1,2% – тонау (1 551), 1,2% – бұзақылық (1 615), 0,8 % – мал ұрлығы (1 051), 0,4 % – адам өлтіру (566), 0,3% – зорлау (421), басқа құқық бұзушылықтар – 32,7% (43 462).

Онша ауыр емес қылмыстар 7,6%-ға (21 826-дан 20 178-ге), ауырлығы орташа қылмыстар 16,8%-ға (58 874-тен 48 992-ге) және ауыр 2,2%-ға (37 548-ден 36736-ға) төмендегені байқалады.

Сонымен қатар, ұрлық 28,3%-ға (42 639-дан 30 593-ке), оның ішінде ұялы телефон ұрлығы 30,9%-ға (10 530-дан 7 273-ке), пәтер ұрлығы 33,5%-ға (3 566-дан 237-ге), көлік ұрлығы 42,2%-ға (258-ден 149) айтарлықтай төмендеді.

Сондай-ақ мал ұрлығы да 30,9% (1520-дан 1 051-ге) азайды», - делінген хабарламада.