Риддерде әйел адам баласымен бірге есірткі таратып жүрген жерінен ұсталды (ВИДЕО)

Риддерде баласымен бірге есірткі таратумен айналысқан 1990 жылғы әйел адам қолға түсті, деп хабарлайды Azattyq Rýhy.

Облыстық ПД мәліметінше, ол өткен жылдың желтоқсан айында кәмелетке толмаған баласымен бірге қалаға келіп, «балалы әйел» мәртебесін пайдаланып синтетикалық есірткі таратумен айналысқан.

Тергеу барысында күдіктінің есірткіні алдын ала ойластырылған схема бойынша сатқандығы белгілі болды. «Жетекшілер» деп аталған қаскөйлер есірткіні «жасырын орындарға» қалдырып отырған, кейіннен қылмыскер оларды алып, әрі қарай таратқан. Ал жасырын орындар ретінде әдетте қоғамдық жерлер немесе қаланың адам аз жүретін, иесіз қалған аудандары таңдалған.

«Жеке тінту жүргізу барысында полицейлер ұнтақ тәрізді зат салынып, изолентамен оралған 80 ораманы тауып, тәркілеген. Сараптама нәтижесі бойынша тәркіленген зат аса ірі көлемдегі синтетикалық есірткі заты екені анықталды.

Қазіргі уақытта аталған факті бойынша сотқа дейінгі тергеу жүргізілуде. Ұсталған азаматша уақытша ұстау изоляторына қамалды, ал оның кәмелетке толмаған баласы кәмелетке толмағандарды бейімдеу орталығына жіберілді», - делінген ПД хабарламасында.