Сыйақыны бопсалайтын қызметкерлерді жазаға тарту мәселесі талқыланды

Мәжілістің жалпы отырысында сыбайлас жемқорлыққа қарсы іс-қимыл агенттігі төрағасының бірінші орынбасары Ұлан Сарқұлов мемлекеттік және мемлекеттік емес ұйым қызметкерлерінің сыйақыны қорқытып алуы бойынша жұмыс жетілдірілетінін айтты, деп хабарлайды Azattyq Rýhy.

Сарқұлов мемлекеттік орган, мемлекеттік және мемлекеттік емес ұйым қызметкерінің заңсыз сыйақыны қорқытып алуына байланысты қылмыстарды анықтау жөніндегі жұмыс жетілдіретінін айтып өтті. 

Түзету мемлекет басшысының жолдауында айтылған тұрмыстық сыбайлас жемқорлықты жою жөніндегі тапсырмасын орындауға бағытталған.

«Жүйелі өткізілетін әлеуметтік өлшеулер азаматтардың халыққа қызмет көрсету орталықтарында, ауруханаларда, жоғары оқу орындарында, банктер сынды орындарда заңсыз әрекеттерге, сыйақыларды қорқытып алушылыққа тап болатынын көрсетті», - дейді Ұлан Сарқұлов. 

Ал Қылмыстық кодекстің 247-бабы бойынша істі тиімді тергеп-тексеру үшін қылмыстық кодекстің 366-бабы («Пара алу») бойынша сотқа дейінгі тергеп-тексеруді жүргізу кезінде тартылатын жедел-іздестіру қызметінің барлық арсеналы қолданылуы тиіс.

«Басқаша оларды анықтау қиын, сондықтан халықта жазасыз қалу туралы пікір қалыптасады. Заң жобасында қорқытып алу белгілері болған кезде сыйақыны заңсыз алу фактілерін анықтау мақсатында, «Жедел-іздестіру қызметі туралы» заңға арнайы жедел іс-шаралар өткізуге мүмкіндік беретін түзетулер енгізу көзделген. Сондай-ақ, қылмыстық кодекс сыйақыны заңсыз бергені үшін жауапкершілікті көздейтін жаңа 247-1-баппен толықтырылып отыр», - дейді бірінші орынбасар. 

Оның айтуынша, бұл парақорлыққа ұқсас, тек алушыларды ғана емес, параны берушілерді де жауапқа тартуға мүмкіндік береді.

«Қылмыстық кодекстің 247-бабының үшінші бөлігі (ірі мөлшерде немесе бопсалаумен сыйақы алу) және 247-1-бабының үшінші бөлігі бойынша (ірі мөлшерде сыйақы беру) ішкі істер министрлігімен қатар, Сыбайлас жемқорлыққа қарсы қызмет үшін баламалы тергеу енгізіледі», - дейді ол. 

Еске салсақ, 2023 жылы сыбайлас жемқорлыққа қарсы қызметтің call-орталығына 27 мыңнан астам қоңырау түскен, оның ішінде 2 мыңға жуық қоңырау eGov мәселелері бойынша және Халыққа қызмет көрсету орталықтарының қызметкерлеріне шағымдар, 1,5 мың өтініш медициналық қызмет көрсету мәселелері бойынша, 940 қоңырау білім беру саласындағы шағым болған.