Абай облысында «қылмыстық гастрольдік квартет» атанған пәтер тонаушылар тобы ұсталды

Абай облысында полицейлер ірі ұрлыққа қатысы бар пәтер тонаушылар тобын қылмыс үстінде ұстады. ҚР ІІМ арнайы бөлімшесінің қатысуымен жедел ұстау операциясы жүргізіліп, қылмыскерлердің әрекеттері қылмыс жасау кезінде тоқтатылды, деп хабарлайды Azattyq Rýhy облыстық полиция департаментіне сілтеме жасап.

Оперативті қызметкерлердің анықтауы бойынша, «қылмыстық гастрольдік квартет» атанған топ Семей қаласына 19 желтоқсанда келген. Келесі күні қаскөйлер пәтерден 15 миллион теңгеден астам қаржының мүлкін ұрлап кеткен. Ұрланған заттардың ішінде алтын бұйымдар мен сейфтен алынған қомақты ақша бар.

«Қылмыстық схема әдеттегідей жоспарланған: екі қатысушы пәтердің құлпын кілт таңдау арқылы ашқан, ал қалған екеуі сыртта қауіпсіздікті бақылап тұрған. Барлық күдіктілер ұсталып, уақытша ұстау изоляторына қамалды. Оларға қатысты ғимаратқа заңсыз кіру арқылы ұрлық жасау бабы бойынша сотқа дейінгі тергеу басталды. Оларға мүлікті тәркілеумен бірге жеті жылға дейін бас бостандығынан айыру жазасы қарастырылуда», - делінген хабарламада.

Айта кетейік, ұсталғандар бұрын да осындай қылмыстар үшін сотталған.