Тағы да лезгинка: Ақтөбеде жол үстінде билеген балаларды тасымалдаған жүргізуші жазаланды (ВИДЕО)
Оған айыппұл салынды
Ақтөбеде жол үстінде лезгинка билеген балаларды тасымалдаған көлік жүргізушісі жауапқа тартылды. Бұл туралы Ақтөбе облыстық ПД баспасөз қызметінен мәлім етті, деп хабарлайды Azattyq Rýhy.
Қазнетте тараған бейнежазбадан көліктің жүргіншілер жолағы маңына тоқтап, ішінен шыққан екі баланың тура жолақ үстінде лезгинка билегенін көруге болады. Бейнежазбадағы билеген балалар Ақтөбедегі лезгинка биі студиясының шәкірттері екен.
«Жүргізуші Әкімшілік құқықбұзушылық туралы кодекстің 593-бабы, яғни, «Жол жүрiсi қағидаларында көзделген жолаушыларды және жүктердi тасымалдау, қауiпсiздiк белдіктерiн немесе мотошлемдердi пайдалану жөніндегі талаптарды сақтамау» бойынша жауапқа тартылды- делінген ПД хабарламасында.
Айта кетейік, бұл бап бойынша 5 айлық есептiк көрсеткiш мөлшерiнде айыппұл қарастырылған.
