Астанада коммуналдық қызметкерлерге бауырсақ пен шоколад таратылды

Астанада Тәуелсіздік күні мен «Ізгі істер марафоны» аясында Алматы ауданында коммуналдық қызметкерлерге қолдау көрсету және тұрғындарға мерекелік көңіл-күй сыйлау акциясы өтті, деп хабарлайды Azattyq Rýhy қала әкімдігінің ресми сайтына сілтеме жасап.

«Акцияны Алматы ауданы әкімдігі қала өміріне маңызды үлес қосып жүрген коммуналдық қызметкерлердің еңбегін бағалау мақсатында ұйымдастырды. Мерекелік шара барысында коммуналдық қызметкерлерге ыстық шай мен жаңа піскен бауырсақтар ұсынылды. Қыстың аязды күндерінде қала тазалығы мен тәртібін қамтамасыз етуде ерен еңбек етіп жүрген қызметкерлерге бұл ерекше қолдау болды. Шарада барлығы 5 кг-нан астам бауырсақ пісірілді», — деп жазылған хабарламада.

Сонымен қатар тұрғындарға ұлттық рәміздер бейнеленген 100-ге жуық мерекелік шоколад таратылды. Акцияға қатысқан Алматы ауданының тұрғыны Ерлан Әлімбеков бұл бастамаға жоғары баға берді.

«Мұндай шаралар нағыз мерекелік көңіл-күй сыйлайды. Еңбек адамдары мен тұрғындарға ерекше көңіл бөлінгені қуантады», – деді ол.