Астанада полицейлер ер адамды өлім аузынан құтқарып қалды

Астанада полицейлер тырыспа ұстаған ер адамға алғашқы көмек көрсетіп, оның өмірін сақтап қалды, деп хабарлайды Azattyq Rýhy полиция департаментінің баспасөз қызметіне сілтеме жасап.

Оқиға патрульдеу кезінде болған. Полицейлер ғимараттан шығып келе жатқан ер адамның есік алдында кенеттен құлап қалғанын байқайды. Жақындап барған олар ер адамның тырысып, тыныс ала алмай жатқанын анықтаған.

«Бір сәтке де кідірместен, полицейлер алғашқы медициналық көмек көрсетті. Олар ер адамның демін қалпына келтіруге тырысты. Сондай-ақ, жақын маңдағы тұрғындар жедел жәрдем шақырды. Полицейлердің жедел әрекеті қайғылы жағдайдың алдын алды. Ер адам медицина қызметкерлеріне тапсырылды», – делінген хабарламада.

Қазіргі уақытта ер адамның жағдайы тұрақты. Полиция департаменті тұрғындарды мұндай жағдайда дереу жедел жәрдем шақыруға және алғашқы көмек көрсетуге дайын болуға шақырады.