Түркістан облысында жеңіл көлік газ құбырына соғылып, тұрғындар жылусыз қалды
Автокөлік соқтығысқаннан кейін екі жерде газ құбыры толық жарылған
Түркістан облысы, Сарыағаш ауданында жеңіл көлік газ құбырына соғылып, салдарынан 6 мыңнан астам жеке сектор абоненті жылусыз қалды, деп хабарайды Azattyq Rýhy.
Жергілікті Otyrar.kz арнасының жхабарлауынша, оқиға 10 желтоқсан сағат кешкі 22:00 шамасында болған. Мамандар апатқа BMW маркалы автомобильдің жоғары қысымды жер үсті газ құбырына соғылуы себеп болғанын анықтады.
Автокөлік соқтығысқаннан кейін екі жерде газ құбырының толық жарылуы, сондай-ақ 40 метрден астам газ құбырының деформациясы орын алған.
«Апат салдарынан 21 өнеркәсіптік кәсіпорын, 153 коммуналдық-тұрмыстық кәсіпорын, 6 821 жеке сектор абоненті газбен жабдықтаусыз қалды. Оқиға орнына полиция қызметкерлері шақырылды. Зақымдалған газ құбырын қалпына келтіру жұмыстары дереу басталды. Оқиға орнында «QazaqGaz Aimaq» АҚ авариялық-қалпына келтіру қызметінің 40-тан астам өндірістік персоналы жұмыс істейді», - делінген «QazaqGaz Aimaq» АҚ баспасөз қызметі хабарламасында.
