Алматыда үйінен кетіп қалған жас ана мен сәби Ақтаудан табылды

Көлік полицейлері іздеуде жүрген жас ананы сәбиімен бірге аман-есен тапты, деп хабарлайды Azattyq Rýhy Polisia.kz-ке сілтеме жасап.

Алматыда 6 желтоқсанда 20 жастағы жас ана сәбиін алып, үйінен шығып кетіп, қайта оралмаған. Ол ата-анасымен бірге тұратын үйінен белгісіз бағытта кетіп қалған.

Оның жоғалғаны туралы полицияға Алматы қаласының 44 жастағы тұрғыны хабарлаған.

«Хабар түсе салысымен көлік полицейлері дереу іздестіру жұмыстарын бастап, жедел әрекетке кірісті. 7 желтоқсан күні Ақтау қаласы әуежайын патрульдеу кезінде желілік полиция бөлімшесінің қызметкерлері жоғалған әйел мен оның сәбиін анықтады. Екеуі де аман-есен табылып, жеке басы тексерілгеннен кейін ата-анасына тапсырылды», - делінген хабарламада.

Жас ананың ата-анасы көлік полицейлеріне дер кезінде көмек көрсеткені үшін алғысын білдірді.