Алматыда коммуналдық қызметтер күшейтілген режимде жұмыс істеп жатыр

Алматыда 8 желтоқсан күні таңғы сағат 4-тен бастап қар жауып жатыр. «Қазгидромет» мәліметі бойынша, таңғы 9:30-да қалада қар қалыңдығы 4 см-ге жеткен. Қар жаууы кешкі сағат 22:00-де тоқтайды деп болжанып отыр, деп хабарлайды Azattyq Rýhy. 

«Қаланы қардан тазарту үшін келесі жұмыстар ұйымдастырылды: 609 арнайы техника жұмылдырылды; 1280 жол жұмысшысы тартылды; 159 құм шашқыш техника 1480 тонна тайғаққа қарсы материал пайдаланылды; Тротуарлар, аялдамалар мен қоғамдық орындарда 64 шағын техника жұмыс істеп жатыр», — делінген әкімдік хабарламасында.

Қалалық коммуналдық инфрақұрылымды дамыту басқармасының мәліметінше, қарды тазалау әр 5 см жиналғаннан кейін жүзеге асады. Таңертеңнен бастап 18 техника колоннасы көшелерді қардан тазартуға кірісті.

Қарды уақытша жол жиектеріне үйіп, кейінірек жаппай шығару ұйымдастырылады. Қар тоқтаған соң жол жиектері, тротуарлар мен пандустар толық тазартылады.