Жамбыл облысында жүк көлігі отқа оранды

Жамбыл облысында жеңіл автокөліктер тиеген автотасығыш өртеніп, өрт сөндірушілер көлікті оттан аман алып қалды, деп хабарлайды Azattyq Rýhy ҚР ТЖМ баспасөз қызметіне сілтеме жасап.

«Жамбыл ауданында республикалық маңызы бар «Алматы — Ташкент» автожолының 531-шақырымында автотасығыштың артқы дөңгелектері өртенген. Көлікте сегіз жеңіл автокөлік болған. Өрт сөндірушілер оқиға орнына жедел жетіп, өртті сөндірді. Қаза тапқандар мен зардап шеккендер жоқ. Өрттің шығу себебі анықталып жатыр», — делінген хабарламада.

Автовоз жүргізушісі өрт сөндірушілер келгенше үш көлікті жалыннан құтқарып үлгерген. Қалған көліктер мен жүк көлігінің жалпы жағдайы тергеу барысында нақтыланбақ.