Трамп, Макрон және Владимир Зеленский үшжақты кездесу өткізді

Онда Украинадағы жағдай, сондай-ақ Таяу Шығыстағы соғыс мәселелері талқыланды

АҚШ-тың жаңадан сайланған президенті Дональд Трамп Парижге ресми сапармен барып, қалпына келтірілген Нотр-Дам соборының қайта ашылу салтанатына қатысты. Бұл оның президенттік сайлауда жеңіске жеткеннен кейінгі алғашқы шетелдік сапары болды, деп хабарлайды Azattyq Rýhy Euronews-ке сілтеме жасап.

Трампты Елисей сарайында Франция президенті Эммануэль Макрон қарсы алды. Макрон 2019 жылы Нотр-Дам соборындағы өрттен кейін Дональд Трамптың қолдауы мен жедел реакциясын еске алып, оған алғысын білдірді.

«Бұл жерде болу – мен үшін үлкен құрмет», – деді Трамп.

Ол Франция мен АҚШ арасындағы достық қатынастардың өткен кезеңдерін және жетістіктерін еске алды.

Сапар барысында Трамп, Макрон және Украина президенті Владимир Зеленский үшжақты кездесу өткізді. Онда Украинадағы жағдай, Ресейдің басып кіруіне қарсы күрес, сондай-ақ Таяу Шығыстағы соғыс мәселелері талқыланды.

Кездесу қорытындысы бойынша Владимир Зеленский әлеуметтік желіде мәлімдеме жасады.

«Президент Трамп пен Президент Макронмен жақсы әрі нәтижелі кездесу өткіздік. Әлемдегі әділ бейбітшілікті орнатып, соғысты тезірек аяқтау үшін бірге жұмыс істеп жатырмыз», – деп жазды ол.

Трамптың бұл сапары мен кездесу барысында талқыланған мәселелер халықаралық қауымдастық үшін үлкен маңызға ие болды.