Алматыда бір топ адам жолды жауып, намаз оқыды

Алматыда бір топ адам жолдың адамдар жүретін бөлігінде намаз оқып, көлік қозғалысын тоқтатып тастады, деп хабарлайды Azattyq Rýhy. 

Әлеуметтік желілерде жарияланған видеода оқиға «Жасыл базар» маңындағы мешіттің жанында болғаны көрінеді. Жолдың ортасында намаз оқығандардың артында жедел жәрдем көлігінің тоқтап тұрғаны байқалады. Сонымен қатар видео кадрларында полицейлер мен дабыл дыбыстары байқалғанымен, тәртіп сақшылары жолды босату үшін ешқандай шара қолданбаған.

Қазақстан Конституциясында көрсетілгендей, Қазақстан – зайырлы мемлекет. Осыған қарамастан, оқиға әлеуметтік желіде әртүрлі пікір туғызды. Алматы қалалық полиция департаментінің мәліметінше, бұл жағдай Медеу ауданында болған.

«Тәртіп сақшылары оқиға орнына барып, азаматтарға құқық бұзушылықтың жауапкершілікке әкелетінін түсіндірді. Жол қозғалысы ережелерін қатаң сақтау керектігін ескертті», — деп хабарлады полиция департаментінің баспасөз қызметі.

Сонымен қатар Алматы қалалық полиция департаменті жағдай бойынша тексеру жүргізіп жатқанын хабарлады.

«Тиісті шаралар қабылданады. Сонымен бірге, Алматы қалалық полиция департаменті «Заң және тәртіп” принципін еске салып, азаматтарды Қазақстан Республикасының заңнамасын қатаң сақтауға шақырады. Кез келген себеппен жолды жабу – жол қозғалысы ережелерін бұзу болып табылады және ӘҚБтК-нің 614-бабына сәйкес жауапкершілікке тартылады», — делінген хабарламада.

Полицияның мәліметінше, осындай құқық бұзушылықтардың алдын алу мақсатында Алматыда профилактикалық және құқықтық түсіндіру жұмыстары күшейтілді.

«Мұндай фактілерге жол беруге болмайды, олар тоқтатылады», — деп атап өтті полиция өкілдері.