Қоныс аудару бағдарламасы бойынша мемлекетті алдамақ болған әйел адам сотталып кетті

Жамбыл облысынан қоныс аудару бағдарламасы арқылы мемлекетті алдағысы келген әйел адам алаяқтық әрекеті үшін сотталып кетті, деп хабарлайды Azattyq Rýhy.

Әйел адам пәтер сатып алу бойынша алаяқтық жасаған. Облыстық соттың мәліметінше, ол Әйет ауылында тұрғанмен, нақты тұруға ниеті жоқ болса да Қостанай облысының Б.Майлин ауданының Оренбургское ауылынан тұрғын үй сатып алу үшін Экономикалық ұтқырлық сертификатын алу мақсатында қылмыстық әрекетке барған.

Осы мақсатта ол әріптесіне одан пәтер сатып алуға уәде еткен.

«Аудан әкімдігінің Жұмыспен қамту орталығына арыз жолдап, жұмысқа орналасуына байланысты тұрғын үй сатып алу шығындарын өтеу үшін өзіне субсидия тағайындауды және төлеуді сұраған.

«Еңбек мобильдігі орталығының» Қостанай облысы бойынша филиалы сатушының шотына 4 млн теңге аударған. Сатып алушы сатушыдан сатып алудан бас тартуына байланысты оларды қайтаруды талап еткен.

Пәтерді сатып алу-сату шарты қайта рәсімделіп, өз қажетіне жаратқан сәтсіз сатып алушыға 4 млн теңге қайтарылған. Осылайша аудан әкімдігіне ірі материалдық шығын келтірілді», - делінген хабарламада.

Сот талқылауы барысында прокурор сотталушымен процестік келісім жасап, оны алаяқтық (ҚК-нің 190-бабы 3-бөлігі 1-тармағы) бойынша кінәлі деп танып, 3 жылға бас бостандығын шектеу жазасын тағайындауды сұрады.

Сотталушы жасаған қылмысына өкініп, кінәсін толық мойындады. Шын жүректен өкіну және жас балалардың болуы жеңілдететін мән-жайлар ретінде танылды. Ауырлататын мән-жайлар анықталмаған.

«Жасалған іс-әрекеттің жеке басын, сипаты мен қоғамдық қауіптілік дәрежесін, істің мән-жайын, сондай-ақ материалдық залалдың ішінара өтелуін ескере отырып, сотталушы кінәлі деп танылып, оған 3 жыл бас бостандығын шектеу жазасы тағайындалды.

Үкім заңды күшіне енді», - деп хабарлайды облыстық сот.