Алматы облысында жол апатынан бір адам көз жұмып, екі жолаушы ауруханаға жатқызылды

Алматы-Бесмойнақ автожолының 77-шақырымында қайғылы жол-көлік оқиғасы тіркелді, деп хабарлайды Azattyq Rýhy облыстық полиция департаментіне сілтеме жасап.

Mercedes Benz 280 автокөлігінің жүргізушісі қарсы қозғалыс жолағына шығып, Ford Focus және ВАЗ-2114 көліктерімен соқтығысты.

Апат салдарынан Ford Focus автокөлігінің жүргізушісі оқиға орнында көз жұмды. Сонымен қатар екі жолаушы ауыр жарақат алып, аудандық ауруханаға жеткізілді. Жағдайдың ауырлығына байланысты медициналық көмек көрсетілуде.

«Аталған жол-көлік оқиғасы бойынша құқық қорғау органдары сотқа дейінгі тергеу амалдарын бастады. Қайғылы жағдайдың мән-жайы анықталып, кінәлі тұлғалардың жауапкершілігі қарастырылатын болады», – деп мәлімдеді полиция департаментінің өкілдері.

Өңір полициясы барлық жүргізушілерді рұқсат етілген жылдамдық режимін қатаң сақтауға және ҚР Жол ережелерін бұзбауға шақырады.