29 қарашада Damubala-да тегін үйірмеге жазылған астаналықтардың нәтижесі жойылды
Кейбір қолданушылардың ереже бұзғаны анықталды
Астанада Damubala платформасы арқылы балаларды шығармашылық үйірмелерге жазу кезінде анықталған ереже бұзу жағдайларына байланысты 29 қарашада жүргізілген жазылу нәтижелері жойылды. Бұл туралы платформа әкімшілігі мәлімдеді, деп хабарлайды Azattyq Rýhy.
«29 қарашада балаларды кезекке жазу барысында кейбір қолданушылар шығармашылық үйірмелерге мемлекеттік тапсырысты орналастыру және олардың жұмыс істеу қағидаларының 10-тармағын бұзғаны анықталды. Осыған байланысты жазылу нәтижелері толықтай жойылады», – делінген хабарламада.
Аталған бұзушылықтарды болдырмау және орындарды әділ бөлу мақсатында жазылу 30 қараша күні сағат 12:00-ге шегерілді.
«30 қарашада сағат 12:00-де 3 мың орынның орнына балаларды шығармашылық үйірмелерге кезекке тіркеу үшін 18 000 орын ашылады», – деп нақтылады Damubala өкілдері.
