Астанада әйелдер кәсіпкерлігі туралы бизнес-форум өтті

Астанада Түркі елдері сауда-өнеркәсіп палаталары одағы жанындағы кәсіпкер әйелдер кеңесінің 3-ші Бас Ассамблеясы және әйелдер кәсіпкерлігінің бизнес-форумы өтті. Іс-шара Түркі мемлекеттері ұйымы (ТМҰ) мен Түркі инвестициялық қорының тікелей қолдауымен ұйымдастырылды, деп хабарлайды Azattyq Rýhy.

Қазақстан, Әзербайжан, Қырғызстан, Түркия және Өзбекстан елдерінен келген 200-ден астам табысты іскер әйелдер, үкімет өкілдері, инвесторлар мен сарапшылар түркі әлеміндегі әйелдердің экономикалық рөлін күшейтуге арналған стратегиялық қадамдарды талқылады.

2024 жылы Кеңеске төрағалық етіп отырған Қазақстан гендерлік теңдікті ілгерілетуде көшбасшылық көрсетті: елдегі шағын және орта бизнестің 49%-ын әйелдер басқарады. Бұл Түркі мемлекеттері ұйымы аясындағы интеграциялық үдерістер мен мемлекеттік қолдаудың тиімділігін көрсетеді. Қазақстан әйелдер кәсіпкерлігін оқыту, акселерация және қаржыландыруға қолжетімділікті жеңілдету бағдарламалары арқылы белсенді дамытуды жалғастыруда.

«Біз түркі әлемінде әйелдер кәсіпкерлігі дамып, жаңа деңгейге көтерілетін экожүйе қалыптастырып жатырмыз. Сауданы жандандыру және елдеріміздің бірлескен жобалары – бұл тек экономикалық өсу ғана емес, сондай-ақ халықаралық байланыстар мен әлеуметтік тұрақтылықты нығайту», – деп атап өтті Түркі елдерінің кәсіпкер әйелдері кеңесінің төрайымы Ләззат Рамазанова.

Өз кезегінде Түркі елдерінің сауда-өнеркәсіп палаталары Одағының (TCCI) бас хатшысы Адем Кула әйелдердің әлеуетін жүзеге асыру мәселесін көтерді.

«Әйелдер — өңірдің тұрақты экономикалық өсуі мен өркендеуінің негізі. TCCI түркі әлемінде әйелдерге өз әлеуетін жүзеге асыруға және жаңа жобаларды дамытуға көмектесетін бастамаларды қолдайды. Қазақстан осы үдерісте елеулі үлес қосуда», — деді.

Стратегиялық салаларға назар аудару

Форумда тау-кен, қайта өңдеу және энергетика сияқты стратегиялық өнеркәсіп салаларында әйелдердің рөлін күшейтуге ерекше назар аударылды. Қатысушылар өндірістегі еңбек қауіпсіздігі мен экономикадағы әйелдер көшбасшылығының дамуына қатысты маңызды мәселелерді талқылады. Сондай-ақ, тұрақты даму және корпоративтік әлеуметтік жауапкершілік мәселелеріне үлкен мән берілді.

«Turkic Business Hub» құру

Ассамблея барысында түркі әлемі елдеріндегі бизнес-әрекетті біріктіру және кеңейту бойынша ынтымақтастық туралы меморандумға қол қойылды. Құжатқа кәсіпкер әйелдердің кеңесі, ҚР Цифрлық даму, инновациялар және аэроғарыш өнеркәсібі министрлігі, ҚР Сауда және интеграция министрлігі, ҚР Өнеркәсіп және құрылыс министрлігі және «Қазпошта» АҚ қол қойды.

«Turkic Business Hub» халықаралық платформасы аймақтағы интеграция мен ынтымақтастықтың маңызды элементі болмақ. Платформа келесілерді қамтиды:

• Кәсіпкерлерге арналған бірыңғай цифрлық экожүйе, стандарттарды үйлестіру және бірлескен инфрақұрылымдық жобаларды іске асыру;
• Бизнесті жетілдіруге арналған білім беру және кеңес беру бағдарламалары;
• Табысты бизнес көшбасшыларынан жаңа кәсіпкерлерге арналған менторлық қолдау және тәжірибе алмасу;
• Электрондық сауда платформасы және қаржыландыруға қол жеткізу, бұл капиталға қолжетімділікті жеңілдетіп, жаңа жобаларды тезірек іске қосуға мүмкіндік береді.

«Turkic Business Hub» іске қосылғаннан кейін елдер арасындағы сауда айналымының алғашқы 2-3 жылда артуы және 100-ден астам бірлескен бастамалардың іске асуы күтілуде.

Тұрақты даму мақсаттарына сәйкестік

Ассамблеяда Түркі елдерінің кәсіпкер әйелдердің кеңесін қысқа және есте қаларлық атауға – TURKIC WORLD BUSINESS WOMEN өзгерту ұсынылды. Бұл бастама түркі әлемінде іскер әйелдер қауымдастығын нығайтуға және Тұрақты даму мақсаттарына қол жеткізуге бағытталған.

«Visa үшін әйелдерге инновациялар мен қаржыландыруға қол жеткізуге көмектесетін бастамаларды қолдау – басты бағыттардың бірі. Біз әрбір әйелдің, қай аймақта өмір сүрсе де, ерекше идеялары мен оларды жүзеге асыруға қабілеті бар екеніне сенеміз. Сондықтан біз кәсіпкер әйелдердің әлеуетін ашуға және экономиканың дамуына үлес қосуға мүмкіндік жасаймыз», — деді Visa компаниясының Орталық Азиядағы бизнес дамыту департаментінің аға директоры Антон Бороздин.

Болашақ қадамдар мен перспективалар

Кәсіпкер әйелдердің кеңесі 2025 жылы стартаптарға арналған акселерациялық бағдарламалар сериясын іске қосып, қатысушы елдерде тақырыптық форумдар ұйымдастыруды және жетекші бизнес мектептер мен аймақ университеттерімен серіктестікте жаңа білім беру курстарын әзірлеуді жоспарлап отыр. Осы бастамалар аясында кәсіпкер әйелдерге гранттар және мамандандырылған оқыту бағдарламаларын қоса алғанда, қосымша қолдау көрсетіледі.

Іс-шараның бас серіктесі – тұрақты даму бастамаларын қолдайтын тау-кен саласының көшбасшысы «Қазақмыс» компаниясы болды. Стратегиялық серіктес Visa цифрландыру және бизнесті дамытуға финтех шешімдерін алға жылжыту арқылы қолдау көрсетті. Мұнай-газ саласындағы жетекші кәсіпорын TШO өнеркәсіптегі әйелдер көшбасшылығын дамытуға жәрдемдесті.