Палестина халқына жинаған қаржыға пәтер мен көлік алған: Перизат Қайрат ісі бойынша жаңа дерек шықты

Перизат Қайраттың заңсыз әрекеттері бойынша тағы бір дерек анықталды, деп хабарлайды Azattyq Rýhy. 

Қаржы мониторингі агенттігі Перизат Қайраттың волонтерлік қызметі аясында жасалған құқық бұзушылықтар туралы жаңа мәліметтер жариялады. Агенттік дерегінше, 2023 жылдың қараша айында Перизат Қайрат Палестина халқына гуманитарлық көмек көрсету үшін қаражат жинаған. Алайда 2023 жылдың желтоқсанында жиналған қаржының басым бөлігін жеке қажеттіліктеріне жұмсаған.

«2023 жылдың желтоқсанында Перизат Қ. бұл қаражатқа элиталық «Sensata Plaza» тұрғын үй кешенінен 49 млн теңгеге үш бөлмелі пәтер және 30 млн теңгеге жаңа «Mercedes-Benz EQE 500 4 Matic» көлігін сатып алды. Сонымен қатар қаржының бір бөлігі Біріккен Араб Әмірліктерінде «Rolex», «Prada» және «Fendi» брендтік бутиктерінен әшекей бұйымдар, сағаттар және киім сатып алуға жұмсалған», —делінген хабарламада.

Тергеу мәліметінше, қаржы жымқыру сомасы 200 миллион теңгеден асады. Қазіргі уақытта тергеу жалғасып жатыр.

«Егер сіз Перизат Қайраттың әрекеттерінен зардап шеккен болсаңыз, агенттікке жүгінуіңізді сұраймыз. Байланыс мекенжайы: Астана қаласы, Бейбітшілік көшесі, 10. Байланыс телефоны: +7 (7172) 70-84-78», — деп жазылған хабарламада.